सुनसरी । बाल विवाहपछि १३ वर्षको उमेरमै आमा बनेकी ममता मरिकको मुटुमा समस्या देखिएपछि थप उपचारकालागि काठमाडौं लगिएको छ ।
छोरी जन्माएको निहुँमा घरपरिवारबाट लखेटिएकी ममता कूपोषित नाबालिका छोरी सहित विराटनगरको नोबेल अस्पतालमा उपचाररत थिइन् । चिकित्सकहरुले मुटुमा गम्भीर समस्या देखिएकाले ममतालाई तत्कालै काठमाडौंमा रहेको गंगालाल हृदय रोग केन्द्रमा लैजान सुझाव दिएका थिए ।
ममतालाई निमोनिया समेत भएको छ । नोबेलको उपचार लगायतको खर्च ब्यहोरेको सुनसरीको गढी गाउँपालिकाको कार्यालयले ममता सहित उनकी आमा र सहयोगी राकेश निरौलाको हवाई जहाज खर्च समेत उपलब्ध गराएको छ ।
ममताको उपचारमा सहयोगी भूमिका निर्वाह गर्दै आएका राकेश निरौलाले गंगालाल अस्पतालमा समेत गढी गाउँपालिका प्रमुख श्रीप्रसाद यादवले आवश्यक समन्वयको पहल गर्ने प्रतिवद्धता जनाएको छ ।
