कञ्चनपुर ।
जिल्लाको भीमदत्त– ९ मटैनामा रहेका राउटे समुदाय चेतना अभावका कारण सरकारी सेवासुविधाबाट बञ्चित भएका छन् ।
कानुनले २० वर्ष नपुगी विवाह गर्न रोक लगाएको भए पनि कलिलै उमेरमा विवाह गरेकाले विवाह दर्ता हुन नसक्दा उनीहरू सरकारले उपलब्ध गराउने सामाजिक सुरक्षा भत्ताबाट वञ्चित भएका हुन् ।
कञ्चनपुरमा राउटे जातीका ८ परिवार छन् । जसमध्ये भीमदत्त नगरपालिका– ९ मटैना, जिमुवामा ५ परिवार छन् भने सोही वडाको खल्लामा ३ परिवार छन् । जसमध्ये ४ जनाको परिचयपत्र बन्न सकेको छैन ।
सरकारले दिएको भत्ताकै भरमा जीवनयापन गर्दै आएका उनीहरूलाई सामाजिक सुरक्षा भत्ताबाट बञ्चित हुँदा दैनिक छाक टार्नसमेत समस्या भएको छ ।
सरकारले जंगलमा फिरन्ते जीवन बिताउँदै आएका लोपोन्मुख राउटेलाई समाजमा स्थापित गर्न मासिक २ हजारका दरले भत्ताको व्यवस्था गरेको छ ।
