लिस्बन।
संयुक्त राष्ट्रसंघीय शरणार्थी उच्चायुक्त (यूएनएचसीआर) ले जर्मनीकी पूर्वचान्सलर एन्जेला मर्केललाई सन् २०२२ को नानसेन शरणार्थी पुरस्कार प्रदान गर्ने घोषणा गरेको छ।
संयुक्त राष्ट्रसंघीय शरणार्थी निकायले मंगलबार जारी गरेको विज्ञप्तिमा मर्केलको ‘नेतृत्व, साहस र करुणाले लाखौं निराश मानिसहरूको सुरक्षा सुनिश्चित गर्न’ साथै सुरक्षा चाहनेहरूका लागि ‘व्यावहारिक दीर्घकालीन समाधान’ खोज्ने उनको प्रयासलाई मान्यता दिएको जनाएको छ।
मर्केलको नेतृत्वमा जर्मनीले सन् २०१५ र २०१६ मा १२ लाखभन्दा बढी शरणार्थीलाई स्वागत गरेको युएनएचसीआरले जारी गरेको विज्ञप्तिमा उल्लेख छ।
विज्ञप्तिमा भनिएको छ, “त्यस समयमा तत्कालीन चान्सलरले आफ्ना सहकर्मी जर्मनहरूलाई विभाजनकारी राष्ट्रवादलाई अस्वीकार गर्न आह्वान गरेकी थिइन् र र उनीहरूलाई ‘आत्म–विश्वास, स्वतन्त्र, दयालु र खुला दिमाग’ हुन आग्रह गरेकी थिइन्।”
शरणार्थीका लागि संयुक्त राष्ट्रसंघीय उच्चायुक्त फिलिप्पो ग्रान्डीले मर्केलले शरण खोज्नेहरूको रक्षा गर्न र मानव अधिकार, मानवीय सिद्धान्त र अन्तर्राष्ट्रिय कानूनको पक्षमा उभिने दृढताको प्रशंसा गरे।
उनले भने, “१० लाखभन्दा बढी शरणार्थीलाई बाँच्न र पुनः जीवन दिन सहयोग गरेर एन्जेला मर्केलले ठूलो नैतिक र राजनीतिक साहस देखाउनुभएको छ।”
युद्ध, उत्पीडन र मानव अधिकार उल्लंघनबाट भाग्न बाध्य मानिसहरूको रक्षा गर्नुका साथै मार्केलले शिक्षा र प्रशिक्षण कार्यक्रमहरू, रोजगार योजनाहरू र श्रम बजार एकीकरणको माध्यमबाट उनीहरूलाई लिर्न र समाजमा एकीकृत गर्न मद्दत गर्ने जर्मनीको सामूहिक प्रयासको पछाडि प्रेरक शक्ति बनेकी थिइन्।
यूएनएचसीआरको ‘नानसेन रिफ्यूजी अवार्ड’ले शरणार्थी, आन्तरिक रूपमा विस्थापित वा राज्यविहीन व्यक्तिहरूको पक्षमा असाधारण मानवीय कार्यलाई मान्यता दिन्छ।
