लिस्बन।
कोरोना बिरुद्धको खोपको डिजिटल प्रमाणपत्र भएका यात्रुहरूलाई अब पोर्चुगल प्रवेश गर्न नेगेटिभ परीक्षण आवश्यक नपर्ने भएको छ।
पोर्चुगल सरकारको मन्त्रिपरिषदको ३ फेब्रुअरीमा बसेको बैठकले सो नियमको अनुमोदन गरेको हो।
सरकारले १ डिसेम्बर २०२१ बाट पोर्चुगल प्रवेश गर्ने हरेक यात्रुहरुले अनिवार्य नकारात्मक परीक्षण नतिजाको प्रमाण प्रस्तुत गर्ने नियम बनाएको थियो। उक्त नियमको खारेजीसंगै नेपाल लगायत विश्वका जुनसुकै देशबाट पोर्चुगल भित्रिने यात्रुहरुले सरकारले तोकेको मापदण्ड अनुसारको खोपको डिजिटल प्रमाणपत्र भएमा नकारात्मक परीक्षण नतिजाको प्रमाण नचाहिने भएको हो।
सरकारले प्रकाशित गरेको बिज्ञप्तिमा भनिएको छ, “यी समायोजनहरूले पर्यटक वा स्थानीय आवास प्रतिष्ठानहरू, रेस्टुरेन्टहरू वा समान प्रतिष्ठानहरू, जुवा प्रतिष्ठानहरू, क्यासिनोहरू, बिंगो वा यस्तै, कार्यक्रमहरू, जिम र फिटनेस केन्द्रहरूमा पहुँचको लागि सरोकार राख्छन्।” यी स्थानहरूमा पहुँच राख्न नकारात्मक परीक्षण वा पूर्ण खोप योजनाको मोडालिटीमा डिजिटल प्रमाणपत्र प्रस्तुत गर्न सकिने छ।
फोटो: लुसा
